கண்டு தேடுதலென்பது

கண்டு தேடுதலென்பது 

விடியல் இளங்காலை காலை
உச்சி மதியம் மாலை
முன்னிருட்டு ...வரை
அவளோடு பேசிப்பேசிப்பேசி
தீரவில்லை
இருள் முற்றிய அடர்த்தியில்
குரல் மட்டும் கேட்டுக்கொண்டிருக்க
சிரித்து வெடித்து
மின்மினிப் பூச்சியாகி மினுமினுத்தாள்
குவித்த
கையிருட்டில் அவளோடு
பேசிக்கொண்டிருந்தேன்
எனக்கு நானே

விடிய விடிய
வெளிச்சத்தில் கரைந்தாள்

மற்றொரு முன்னிருட்டு இரவாய் முற்ற
மின்மினிக்காக காத்திருந்தேன்
பேசிக்கொண்டிருக்கயிலேயே
குவித்த கையிலிருந்து எகிறிப் பறந்தாள்
மேலே
மேலே மேலே
மேலே மேலே மேலே
மேலே மேலே மேலே மேலே
......
ஒளிர்ந்து சிரிக்கும் நட்சத்திரங்களில்
எது
என் மின்மினி ?

நகர்வு

நகர்வு 

http://www.youtube.com/watch?v=DQyNkyDXNDs

நிலவுக்கும் எனக்கும்
இடையே
நிர்மல வானம்

அசையாமல்

ஒருவருக்கொருவர்
பார்த்துகொண்டு நிற்கிறோம்   
என் கண்களில்
இரு நிலவுகள் மிதக்க.

எங்கிருந்தோ
மெல்லிய மேகப் பிசிறுகள்
எங்களிடையே நீந்திப் போகையில்

நகர்கிறது என் நிலவு
இடைவெளி தூர மாற்றமின்றி

த்யானம்

த்யானம் 

கணுக்கள்
காலத்தின் கணக்கெனத்
தடிக்க
நட்டபுள் நெடிது வளர்ந்தது
பூதங்கள் தின்று
நீர்ச்சுவை ஏற்றி

அடி நுனி சுவைகள்
விலகி நிற்கக் கண்டதெல்லாம்
உண்டவர்க்கே

தன்னில் தனை உணர
தான் வளர்ந்து
நான் ஒறுத்து

தலையில் பச்சைத் தாமரை
தோகை விரிக்க
போகிற போக்கில்
அதைத்
தொட்டுப் போகிறது
ஒரு பட்டாம் பூச்சி

கவிதைகள்

பளிச்சிட்ட  எண்ணங்களை ,
அகப்பயணங்களின் 
அனுபவங்களைச்
சொல்ல முயன்று

ஆசை காட்டிய சொற்களில்
தரம் அறிந்து தேர்ந்து

நெய்ய

கண்ணுக்கு எட்டி
கைக்கு எட்டா
பனிப்புகையாய் 

குறைந்த பட்ச தோல்விகள்
என் கவிதைகள்

பாய்மரக் கப்பல்

பாய்மரக் கப்பல் 

நட்சத்திரங்கள் 
எவ்வளவு தொலைவில் 
இருந்தாலும் 
எதிரில்தான் இருக்கின்றன 

நீயும் நானும்
பேச நேர்கையில் 

சொல்லத் தவித்ததை 
சொல்லத் தவிர்த்ததை 
சொல்லத் தடுத்ததை 

சொற்களின் துணையின்றி 
பிரயாசைகளற்று 
நாம் 
புரிந்துகொண்டபோது 

தயக்கங்களின் கரைகளிடையே 

பாவனைகள் தோற்று 
ஆறாய் ஓட 
அலைக்கழிப்புகள் ஊடே 
வெற்றிகரமாய் பயணிக்கிறது 
தீரா அன்பின் 
பாய் மறக்கப்பலொன்று 

ஏளனப் புன்னகை 
சிந்திக்கொண்டே 

இலையுதிர்வில்

 இலையுதிர்வில்

 தனை வளர்த்த நிலத்தின்

பின்னமாய் தான் வளர்ந்து

ஒரு

இலையுதிர்வின்

நன்றிக்கடனில்

மண்ணுக்குத் தருதலில்

தன்னை பின்னமாக்கி

முழுமைபெற்று

உயர்ந்து நிற்கும் மரம்

மனிதரின் சிறுமைக்கெதிராய்

அலட்டலின்றி

பனித் துளிகள்

பனித் துளிகள்

ஊகித்து 
முன்கூட்டியே திட்டமிட்டு 
மிகுந்த பிரயாசையுடன் 
தவிர்க்கத்  தீர்மானமாகி இருந்தேன் 

சந்தித்துக் கொள்கையில் 
 அக் கணத்தை சந்திக்கையில்

புல்லின் மேலமர்ந்த பனித்துளியை 
சுண்டி விடுவதைப்போன்ற 
அனாயசத்துடன் 
நீ 
சுண்டிவிடத் 
தெரித்துச் சிதறினேன் 

இன்னும் சிறு பனித் துளிகளாய் 


 

முடிவதெல்லாம்

எவ்வளவு முயன்றாலும்
பேனாவின் மூடிகளை மறந்துவிடும்
அசிரத்தைகளை

விரட்டமுடிவதில்லை

மூடியற்று கிடக்கும் பேனா முடிதுறந்த அரசனையையும்

பேனாவை இழந்த மூடி
சீவப்பட்டு உருண்ட தலையையும்
போன்ற படிமமாக

சமயத்தில்
அவை
நான்
திட்டமிடக் கையாலாகாதவன்
என்பதை உலகிற்கு உணர்த்திக்கொண்டே
இருப்பதையும் சகிக்க முடிவதில்லை

இப்போதெல்லாம் -

அனாதையான மூடிகளை
ஆதரவற்ற பேனாக்களுடன்
பொருத்தி விடுகிறேன்

நிறம் வடிவம் உள்ளிட்ட
எந்தப் பொருத்தமும் இல்லாவிட்டாலும்

பொருத்தம் பார்க்காதபோது
அவை
பொருந்திப்போகின்றன
என்ற கச்சிதத்தை வியந்து

கடலோரம்

கடலோரம் 

உங்கள் அறிவுடைமை 
சமுத்திரத்தின் விஸ்தீரணம் 

என் போதாமைகள் 
நிலத்தின் விஸ்தீரணம் 

புத்தகமொன்றை கையிலெடுக்கையில் 
                                                            காலாற நடக்கிறேன் 
                                                            கடற்கரையில் 
                                                            சிற்றலை சிறுமணல் 
                                                            தழுவ தழுவ  

சுடர்

சுடர்

எங்கிருந்தோ எகிறி வந்து

அமர்ந்தது 

பொறி ஒன்று 

பற்றிக் கொண்டு 

எரிந்தபடி 

மூச்சுக் காற்றில் 

இருள் சூழ அணைக்கையில் 

உறைந்தது ஒன்று 

கரைந்தது ஒன்று  

பாம்பு

பாம்பு  

மனக் குடத்தில் 
பதுங்கிச் சுருண்டு 
நெளிந்து 
நெகிழ்ந்து 
பார்வை மகுடி கண்டு 
படமெடுத்து விரியும் 
நேசம் 
இச்சை உடல் குறுக்கிய படியே 

சலனம்

 சலனம் 

அறியும் நொடித்துணுக்கு வரை 
அறைந்து மூடிய அறைக் கதவு 
மனம் -

மூடிய கதவின்
இடைவெளி வழியாய் 
கசியும் ஒளி 

தவிர்க்க 
கண்மூடுகையில் 
காட்சியாய் விரிகிறது 

சன்னமான ஒளி
மனத்தை மூடிய 
திரைச்சீலையை அசைக்க 

சலனம் 

 

சிதைவு

சிதைவு  

ஒற்றைக் காலில் வெண் கொக்கு 
கால்  புதைந்த 
நீர்ப் படலத்தில் 
பிம்ப முகம் நோக்கி -

சிறு மீனொன்று கண்டு 
சட்டெனக் கொத்தியபோது 
சிதைந்தது 
முகம்  
உயிர்

வர்ண ஜாலம்

கருப்பு வெள்ளை காலத்திற்கு முன்பே
வர்ணங்கள்
தனித்தும் இணைந்தும்
நிறமாலைகள் இருந்ததாம்

புது வர்ணங்கள் வந்தபின்
ஒற்றைநிற ஒளிப் பாய்ச்சலில் 
காணாமல் போயின பழைய வர்ணங்கள் 

எனினும் -

வர்ண விளக்கானாலும்
ஒற்றைநிற விளக்கானாலும்
ஏனோ 
எல்லாப் பொருட்களின் நிழலும்
ஒரே நிறத்தனவாய்

இசைக்குறிப்பு

மழை ஓய்ந்த

முன் மாலை ஒன்றில்

இரு மின்சாரக் கம்பங்களின் 

இடையில் மின்கம்பிக் கோடுகளில்

வரிசையாய் 

வெவ்வேறு தினுசாய் அமர்ந்திருக்கும

காக்கைகளை பார்க்கையில்

ஒரு கணம் தெரிகிறது 

இசைக்குறிப்பு 

புதின ஓவியம்

என் புதினத்தின்
சில பக்கங்களில்
வந்து போயிருந்த ஒரு
கதா பாத்திரத்தை
வரைந்து கொண்டு வந்து
காட்டினான் வாசகன் 

கற்பனையைக் கடன் வாங்கிக் கொண்டது போல் 
அப்படியே 
நான் நினைத்திருந்தது போலவே
நான் விவரித்திருந்தது போலவே


உயிர்  பெற்ற வரியாய்
உதடசைத்தபடி 
அது பேசியபோது
அதில் ஒன்று கூட
நான்   பேசச் சொன்னது இல்லை

குருவி 

அசையும்  கிளையொன்றில் 
அமர்ந்திருக்கும் குருவி 
அவ்வப்பொழுது 
தன் நேற்றைக்குள்ளும் 
அவ்வப்பொழுது 
தன்  நாளைக்குள்ளும் 
பறந்து மிதந்து 
மீண்டபடியே இருக்கிறது 

ஆனால்  
சிறகில் ஒட்டிய 
சாம்பல்  தூளிகளும் 
சூல் மகரந்தப் பொடிகளுமாய் 
அமர்ந்திருக்கும் அக்குருவி 
அந்த அசையும் கிளைவிட்டு
அகன்றதில்லை 
எப்போதும்