அப்பாலும்
பார்ப்பதற்கு அப்பாலும்
ஏதோ செய்துவிடுகின்றன
சில கண்கள்
முறுவலுக்கு அப்பாலும்
ஏதோ செய்ய முயலுகின்றன
சில புன்னகைகள்
கடந்துபோன பின்னும்
கூட வருகிறார்கள் சிலர்
அல்லது
கூடப் போகிறேன்
உள்ளங்கை வியர்க்க
காற்று வீசுகையில்
உரசித்தொலைக்கின்றன
இலைகள்
எல்லை மீறாதுதான் கடல்
தவிர்த்துத் திரும்பினாலும்
விட்டுத்துரத்தும் கால்சுவடுகள்
எலக்ட்ரானிக் பல்லியென
உச் உச் செனும் கைபேசி
கண்ணை மூடிக்கொள்கையில்
கருநீலம் படரத் தூக்கம்
கடலின் அடியாழத்தில்
கசிந்து உள் நுழைந்த வெயிலின்
கண்கூசா மினுக்கல்
எப்போது துவங்கியது
என்றறியா கணங்களின் நீட்சியில்
அறிந்த குழலிலிருந்து
அறியாத ராகம்
தூக்கத்திலிருந்து விழிப்பிற்கோ
விழிப்பினின்று தூக்கத்திற்கோ
தடுமாறிய கணத்தில்
திரும்பிப் படுத்திருந்தது
பனியன் அணிந்த முதுகு
