இன்னும் பறந்து கொண்டிருக்கும் பறவை

மீன்கொத்தி  ஒன்று
அமைதி சலசலத்த
நீர்ப் பரப்பின்மேல் அந்தரத் தொங்கலாய்

ஒரு கணத்தின் துணுக்கில்
நேர்க்குத்தாய் வீழ்ந்த கல்லென
'பளக்' கென்று மீன் கொத்திப் போனது

மற்றொரு முறை
அந்த கணத்திற்காக காத்திருந்து 
உயர் ரக காமிராவில் படம் பிடித்து வைத்துப்
பார்த்தேன். 

மீண்டும் மீண்டும் அதைப் பார்த்தேன்

பின் 
ஒரு ஞாயமான நொடியில் 
பதிவு செய்த இயற்கை
பார்த்து ரசித்த இயற்க்கைக்கு செய்யும்
அவமரியாதை என உணர்ந்து

அழித்தேன் 

ஒளி வண்டு

நெடுக்கை உலகின் உணர்வொழிந்து
கிடக்கை உலகின் உணர்வெழுந்து
படுக்கை
பின் மிதக்க மறக்க -

கனவின் நிழலில் தெளிந்தவை
நனவின் ஒளியில் உருமறைய
கனவை மீட்கப் போராட்டம்
அமிழ்ந்தும் எழுந்தும் மிதந்தும்

ஓடம் செலுத்திப் போகையில்
சிவந்து தவிக்கும் நீரில்
பச்சைத் தாமரை
காற்றில் நூலாடும் ஒளிவண்டு
ங்கொய் ய் ய் ய்
பிறிதொரு தாமரை கண்ணுற
ஒளிவண்டு
ஒரு வண்டா ? ஒரே வண்டா ?
இரு மலர்களை ஒரே சமயம்
கண்ணுற இயலா ஓடப் பயணத் தவிப்பில்
கலைந்த கனவு 
சிவப்பாய்க் கவிந்த இருளில்
காட்சிகள் மறைந்து
காதில்  ங்கொய் ய் ய் ய்

சொல்லம்பு

பரம்பரையின்
கால வெள்ளத்தில் மூழ்கி
எண்ணச் சேற்றில் புதைந்து
நினைவுகளில் அரிப்பில் சிதைந்து
முனை மழுங்கி
துருவேறிக் கிடந்த  அம்பொன்றை

யதேச்சையாக வீசியபோது

தனது சிருஷ்டி புதுக் கருக்கில்
தைத்தது போலவே
தைத்தது
சொல்லம்பு 

கேள்விகள்

விடக்கூடாது.

கேட்டுவிடவேண்டும்  என்று
தொண்டையில் சேமித்த கேள்விகள்
சிக்கிக் கொண்டன சமயம்  வாய்த்த போது

மறுமுறை - தயாராக வைத்திருந்து
வீசக் காத்திருந்தபோது
எதிர்கொள்ளும் மன நிலையில் அவர் இல்லை

இன்னொருமுறை சமயம் வாய்த்தபோது
ஏனோ கேட்க இஷ்டமில்லை

மற்றொரு முறை
எல்லாம் சரியாக அமைந்திருந்தது
ஆனால் அவரைப் பார்க்க பரிதாபமாக இருந்தது


நான் கேட்கவிருந்த  கேள்விகளுக்கான
அவருடைய பதில்
என்னிடமே இருந்தது என்பதை
ஏதோ ஒரு கணத்தில்  அறிந்த போது 
குழப்பாக இருந்தது

நான் கேட்க விரும்பியவை
யாரிடம் ?

முதல் நிலவு

நிலவைக் காட்டி
அதிசயிக்கும்
மழலை விரலின்
ஒரு முனையில்
முதல் நிலவு 

கனவு

கனவை சுமந்த

கனவொன்றை

கனவு கண்டிருக்கையில்

ஒன்றின் விழிப்பில்

உதிர்ந்து போனது

மற்றெல்லாம்

எது எதைக் கலைத்தது

என வியந்து       

கடிதம்

நாம் சந்தித்துக்கொள்ளும் தருணத்தை
நாம் சந்திக்கும் வரை
எண்ணங்களின் சிறகசைவு