காகம்

ஒரு மின்சாரக் கம்பத்தின்
கீழே
குப்புறக் கிடக்குதொரு காகம்

அண்டவிடாமல்
கரைந்து துரத்துகின்றன
அதன் உறவுகள்

ஓரிருமுறை அலகால் கொத்தி
அசைத்து தோல்வியுறுகிறது
ஒரு காகம்

கொஞ்ச நேரத்தில்
யாருமற்றுக் கிடக்குதந்தக் காகம்
சிறகில் உறைந்த உயிர்

திடுமென்று கிளம்பிய
மெல்லிய காற்றொன்று
போகிற போக்கில்
அதன் சிறகுகளை சிலுப்பி
அசைத்துவிட்டுப் போகிறது

சிலந்தி

மூடப்படாத 

என் வீட்டு முன் வாசல் 

கதவு 

யாரும் வரலாம்

யாரும் போகலாம்

ஆனால்

யாரும் வரவில்லை

யாரும் போகவில்லை

நானே கூட

கதவு மட்டும் எப்போதாவது

உள்ளே வருவதும்

வெளியே போவதுமாய்

அசைந்தபடி அங்கேயே நிற்கிறது   

கால காலமாய்

மண்டையுள்  தொங்கும்

சிலந்தி