கம்பிக் கதவைத் தாண்டி
கொத்திஎடுத்து எடையிட்டபோது
கூடவோ குறையவோ இருந்திருக்கவேண்டும்
அதை தரையில் வீசிவிட்டு வேறொன்றை தேட
கழுத்து முறிவினின்று
கணதூரத்தில் தப்பிய சேவல்
கூட்டத்தில் கலந்து, கூட்டம் கலைத்து
பேடை துரத்திச் சிலிர்த்து
சிறகு பரப்பிச் சீறிப் புணர்ந்து
மறுபடி இரை கொத்தச் செல்லும்
சாவதானம்
எதுவும் அறியாமலா?
எல்லாவற்றையும் அறிந்தா?
யதேச்சையான
ஒரு சந்திப்பின் நீளம் சிநேகம்
எதிர்பாராத ஆனால் காத்துக்கொண்டிருந்த
ஒரு சந்திப்பின்போது
பேச்சின் நெருக்கத்தில்
என்னில் குரங்கொன்று விழித்துக்கொண்டது சப்தமின்றி
பேச்சின் மீது வைத்த தக்கையை கவனித்தபடி
அப்போது தெரிந்தது
அவளும் மறைக்க முயன்றுகொண்டிருந்த அவளுடைய குரங்கு
மௌனத்தினால் ஒரு மதில் .
மிருதுவான கணம் ஒன்றில் இரவல் கேட்க ஆசை
இரவல் தரும் ஆசையும் வெளிப்பட,
மதில் ஏறி குதித்தது ஒரு பூனை ஓசையின்றி
இரவலாக பரிமாறிக்கொள்ள விழைந்தபோது
ஒரு பிசகிய கணத்தில்
சட்டென கைநழுவி பட்டென உடைந்து தெறித்தது
சுதாரித்து பின்
காயம் படாமல் பொறுக்கிக்கொண்டிருந்தோம் சில்லுகளை
இன்னும் பூனையை விரட்டாமலேயே
ஒரு கனவின் மிதப்பில் வராது போனாலும்
ஒரு குதூகலத்தின் உச்சியில்மறந்துபோனாலும்
ஒரு சுகத்தின் நெகிழ்வில் நிற்காது போனாலும்
ஒரு சுவையின் விளிம்பில் தவழாது போனாலும்
ஒரு செருக்கின் நுனியில் ஆடாமல் போனாலும்
ஒரு வெற்றியின் முடிவில் தவழாது போனாலும்
என் வலியின் போது பொறுமையாகவும்
என் காயத்தின் போது வலிமையாகவும்
என் சோர்வின்போது வருடலாகவும்
என் இமைகள் நனையும்போது தென்றலாகவும்
ஒரு முறை கூட தவறாது வரும்
நீதான் இந்த சுய நல வாதியின்
என் உயிர்த்தோழி
உண்மையைப் பொய்யில்
சுருட்டி வைக்க முடியுமா?
தீயைப் பூவில்
அடக்கி வைக்க முடியுமா?
காற்றை நீரில்
பதுக்கிவைக்க முடியுமா?
நீரை நிலத்தில்
புகுத்தி வைக்க முடியுமா?
என்னை என்னில்
புதைத்து வைக்க முடியுமா?
என்னைக் கூப்பிட்டமாதிரி இருந்ததே
கூப்பிட்டயா?
இல்லையே..
நிச்சயம் கூப்பிட்டமாதிரிதான் இருந்தது
நானில்லை. வேறு யாராவதாக இருக்கலாம்
இல்லை. உன் குரல்தான் அது
அப்படியெனில் குரல் என்னுடையதாகவும்
அழைப்பு உன்னுடயதாகவும்
இருந்திருக்கலாம்.
