சில பழையதாயும்
சில புதிதாய் சேர்த்தும்
விரல் கணுக்களில் தட்டி சோதித்து
கவிழ்த்து வைக்கப்பட்ட பானைகள்
தலைமுறை களாய்
கைதவறியோ
அவசர எலி உருட்டியோ
ஆவேசப் பூனை உருட்டியோ
சரிந்தன சில்லோடுகளாய்
ஆளுக்கொரு சில் லெடுத்து அவரவர்
வீசியது போக
காலம் சிதைத்த பாழ் குளத்தில்
எதேச்சையாய் எடுத்து வீசும்போதும்
அது வீசும் அலைகள்
வார்த்தைகளென தைத்து விரியும்
குளத்தரை அடிச் சகதியிலும்
அம்பெனப் புதைந்து
காத்துக் கிடக்கும் தூர் வாரும் தினம் நோக்கி
சாவற்ற
சாகடிக்கும் வார்த்தைகள்