பாம்பு

பாம்பு  

மனக் குடத்தில் 
பதுங்கிச் சுருண்டு 
நெளிந்து 
நெகிழ்ந்து 
பார்வை மகுடி கண்டு 
படமெடுத்து விரியும் 
நேசம் 
இச்சை உடல் குறுக்கிய படியே 

சலனம்

 சலனம் 

அறியும் நொடித்துணுக்கு வரை 
அறைந்து மூடிய அறைக் கதவு 
மனம் -

மூடிய கதவின்
இடைவெளி வழியாய் 
கசியும் ஒளி 

தவிர்க்க 
கண்மூடுகையில் 
காட்சியாய் விரிகிறது 

சன்னமான ஒளி
மனத்தை மூடிய 
திரைச்சீலையை அசைக்க 

சலனம் 

 

சிதைவு

சிதைவு  

ஒற்றைக் காலில் வெண் கொக்கு 
கால்  புதைந்த 
நீர்ப் படலத்தில் 
பிம்ப முகம் நோக்கி -

சிறு மீனொன்று கண்டு 
சட்டெனக் கொத்தியபோது 
சிதைந்தது 
முகம்  
உயிர்