தவிர்க்க முடியாத எதேச்சை

சிக்னலுக்கு காத்திருக்கும்
பேருந்தின் ஜன்னலோர இருக்கையில் இருந்து
மிக அருகில் வந்து நிற்கும் அடுத்த பேருந்தின்
ஜன்னலோர பிரயாணியை பார்ப்பதும் -

நிலைக்கண்ணாடி ஒன்றினைக் கடக்கும்போது
தன் முழு பிம்பத்தை காண்பதோ
முடிக்கற்றையை சரிசெய்து கொள்வதோ -

வாசகம் பதித்த 
இறுக்கமான மேலுடையில்
கடந்து சென்ற பெண்ணின்
முகம் நினைவுக்கு வராததும் -

பின்னிரவு வேளையில்
பேருந்து நிலைய சுவரோரமாய்
தனியாக நிற்கும் பெண்ணின்
முகத்தை நேராக பார்க்க முயல்வதும் -

கொளுத்தும் வெய்யிலில்
கைக்குழந்தைப் பிச்சைக்காரியின்
குழந்தையைப் பார்க்காமல்
கைகளை மட்டும் பார்த்து காசு இடுவதும் -    


தவிர்க்க முடியாத எதேச்சைகளாவது

எல்லோருக்கும்தனா?   

 

 

 

ஒற்றைக்கதவு

ஆள் நடமாட்டமற்ற வெளியில்
லேசாகத் திறந்தபடி
மூடி இருக்கிறது
அந்த
ஓரறையின் ஒற்றைக்கதவு
ரகசியமொன்றின் கசிவைப் போல.

சந்தேகமே இல்லை

உள்ளிருக்கும் இருவர்
சந்தேகத்தைத் தவிர்க்க
அப்படி செய்திருக்கலாம்
சந்தேகச் சிறகுகள் முளைத்துக்கொள்ள

ஒரு சமயத்தில்
கதவு மிக மெதுவாக மூடப்பட
முளைத்த சிறகுகள் படபடத்தன
சற்று நேரத்திற்குப் பின்
அக் கதவு 
அகலமாய்த் திறந்து கொண்டது

அதேதான். சந்தேகமில்லை. 

அவ்விருவரும் வெளியே வரக்
காத்திருந்து -
பின்
சட்டென உள்நுழைந்து அவர்களுக்கு
அதிர்ச்சி தரலாம் என
சரேலென உள்நுழைந்தபோது
அதிர்ச்சியுடன்  வரவேற்றது
ஆட்களற்ற அறை

காற்றின் சூழ்ச்சி
         
   

முரசு

பின்னழகில்
பின்னலழகில்
இரட்டின் முரசில்
மோதும் ஒற்றைக் கொம்பில்
அதிர்ந்தது

மனம்  

படர்க்கையின் திணறல்

இருவர்க்கு

மூன்றாமவராய் இருக்கும் 

படர்க்கையின் திணறல்

இரு சர்பங்களின் ஆதி மொழிக்கு

பதவுரை எது? 

ஏது?

அசைவின் ஒலிமொழியில்

அவரவர் 

தத்தம் பொற் குணங்களை உரசி ருசுப்பிக்க 

ரணப் பொன் மின்னும் உரைகல் 

இல்லாதது

இல்லாதது என்ற சொல்
எளிமை தாண்டியது


இருந்து இல்லாமல் போவது
இருந்தும் இல்லாமல் போவது
இல்லாமலே இல்லாததாகிப் போவது
இல்லாமல் இருப்பது
தெரியாததால் இல்லததாகிப் போவது
தெரிந்தும் மறுத்தலால் இல்லைஎன்றாவது
இவற்றுள் சொல்ல அடங்காதது என
இத்தனை இருக்கிறது இல்லாததைப் பற்றி !

சாகா வார்த்தைகள்

சில பழையதாயும்

சில புதிதாய் சேர்த்தும்

விரல் கணுக்களில் தட்டி சோதித்து

கவிழ்த்து வைக்கப்பட்ட பானைகள்

தலைமுறை களாய்

கைதவறியோ

அவசர  எலி உருட்டியோ

ஆவேசப் பூனை உருட்டியோ

சரிந்தன சில்லோடுகளாய்

ஆளுக்கொரு சில் லெடுத்து அவரவர் 

வீசியது போக 

காலம் சிதைத்த பாழ் குளத்தில் 

எதேச்சையாய் எடுத்து வீசும்போதும் 

அது வீசும் அலைகள்

வார்த்தைகளென தைத்து விரியும்

குளத்தரை அடிச் சகதியிலும்

அம்பெனப் புதைந்து 

காத்துக் கிடக்கும் தூர் வாரும் தினம் நோக்கி

சாவற்ற

சாகடிக்கும் வார்த்தைகள்    

 

   

    

 

அவன்

அவனை 

புத்திசாலி என்றெண்ணும் முட்டாள்களுக்கு

நிறை வார்த்தைகளில்

நீவிக் கொடுக்கிறான்.

அவனை 

முட்டாளென் றெண்ணும் 

புத்திசாலிகளிடம்

பட்ட காயத்தை நக்கிக் கொள்கிறான்

அவனை

புத்திசாலி என்றெண்ணும்

புத்திசாளிகளுடன்

மெளனமாக கைகுலுக்கி

முறுவலிக்கிறான்.

அவனை 

முட்டாளென் றெண்ணும் 

முட்டாள்களிடம்

சேர்ந்து மகிழ்ந்து சந்தோஷிக்கிறான் 

என்னே

சந்தோஷகரமான

சந்தோஷமயமான

வாழ்விது!      

காகம்

ஒரு மின்சாரக் கம்பத்தின்
கீழே
குப்புறக் கிடக்குதொரு காகம்

அண்டவிடாமல்
கரைந்து துரத்துகின்றன
அதன் உறவுகள்

ஓரிருமுறை அலகால் கொத்தி
அசைத்து தோல்வியுறுகிறது
ஒரு காகம்

கொஞ்ச நேரத்தில்
யாருமற்றுக் கிடக்குதந்தக் காகம்
சிறகில் உறைந்த உயிர்

திடுமென்று கிளம்பிய
மெல்லிய காற்றொன்று
போகிற போக்கில்
அதன் சிறகுகளை சிலுப்பி
அசைத்துவிட்டுப் போகிறது

சிலந்தி

மூடப்படாத 

என் வீட்டு முன் வாசல் 

கதவு 

யாரும் வரலாம்

யாரும் போகலாம்

ஆனால்

யாரும் வரவில்லை

யாரும் போகவில்லை

நானே கூட

கதவு மட்டும் எப்போதாவது

உள்ளே வருவதும்

வெளியே போவதுமாய்

அசைந்தபடி அங்கேயே நிற்கிறது   

கால காலமாய்

மண்டையுள்  தொங்கும்

சிலந்தி  

        

மீட்பு

மீட்பு

வரிசையிலிருந்து வழுக்கி
கண்ணுக்குள்ளேயே விழுந்துவிட்ட  இமை  

வாயிலிருந்து தப்பி
வாழ்க்கைக்குள்ளேயே விழுந்துவிட்ட சொல்

இரண்டையுமே

கண்ணீரோடுதான்  துடைத்தெடுக்க முடிகிறது

நினைவு ருசி

நேர்ந்த பயணத்தின்
நினைவு ருசிகள் பல
உலகின் பருவச் சுழற்சி

கிழித்து கசக்கி கையில் திணிக்கப்பட்ட
பேருந்துச் சீட்டு போல
அதிபத்திரமும்
அதி முக்கியத்துவமும்
பெற்று விடுகின்றன 

எதுவரையோ அதுவரை